albejawi

بنت ترغب في الزواج 2

استعرض الموضوع السابق استعرض الموضوع التالي اذهب الى الأسفل

بنت ترغب في الزواج 2

مُساهمة من طرف admin في الجمعة يناير 09, 2009 1:18 am

مرات اقعد مع نفسي افكر...هو ليه انا عايزة اتزوج من اصله..ما انا اهو زي الورد...طالعة نازلة ماكلة شاربة مبسوطة بتونس بتفسح...طيب ايه المشكلة من اساسو؟...
اجد نفسي سارحة بعيد بخيالي واتخيل الاطفال والازعاج والتربية والمسؤلية...ده كله كوم وكلام الناس كوم...
ضل راجل ولا ضل حيطة!!
طيب مالها ضل الحيطة..ما اهي بتحمي من الشمس والحمد لله!!

بس...في اوقات تانية بكون في لحظات تفكير عميق...واقول لنفسي طيب ليه ما اتزوج؟؟؟!في اسباب اكثر بتخليني افكر في الزواج...وكل البنات في جميع المستويات اكيد بيحسوا بكده.

واحدة مثلا بتكون عايزة تتزوج لان نفسها في اطفال
واخري عايزة تتزوج عشان ما تحمل لقب عانس
واخري عايزة تتزوج عشان تتفسح وتتمتع مع زوجها...وهلم جرا
نتابع

مرة كنت ماشة في الشارع...وشايفة الناس شايلة دببة صغيرة
قلت يا بت...جايز ده يكون عيد الطفولة!!
شوية كده والقي الناس كلها لابسة احمر...اقول لنفسي:
جايز المريح لاعب اليوم!!!
امشي شوية تاني..القي الناس شايلة قلوب حمراء
قلت يا بت..جايز ديل بتاعين حملات التبرع بالدم
امشي تاني خطوتين..واشوف الناس شايلة شمع
قلت يابت..جايز الكهرباء حا تنقطع اليوم
بعد شوية اشوف الناس شايلين الورد الاحمر
قلت يا بت: لا...الظاهر..................
وقبل ان استرسل في خيالي...قاطعتني صديقة لي قائلة:
يخسي عليكي...يعني ما بتباركي لي اليوم....
هو في ايه!!!
الفلنتاين!
مين ده؟؟؟؟؟
عيد الحب..
كل سنة وانتي طيبة..معليش متاخرة شوية..
بس انا ايه عرفني بالبتاع ده؟؟؟؟؟!!!!!
دايما بخاف من حظي...ولي موقف يتعلق بالزواج حاحكيه هنا بس ما تضحكوا علي...

انتو عارفين احساس البنت لمن تكون ماشة في الشارع وتشعر انو في زول معجب بيها؟
ما معاكسة يعني..لكن شعور حقيقي من الشخص المعجب وكده...وعلي فكرة في زيجات
كثيرة بدات كده...واحد يشوف واحدة في الشارع...يمشي وراها..يعرف ساكنة وين..
ويسال عنها ثم يخطبها...

المهم..انا يوم خارجة من البيت وماشية للمواصلات حسيت انو في زول بيبحلق فيني
شديد...اتداريت منه بخباثة ونظرت بطرف عيني لقيت راجل طول وعرض ووسامة ماسك في ايده شنطة سامسونايت ولابس بدلة وكرافته ونظارة شمسية...الولد عجبني وقلبي اصبح يختلج اول ما شفته..
وفجاة جاء البص فرحت ركبته وراح هو راكب خلفي...قلت لنفسي معقول الشياكة دي كلها تركب الباص!!
لا بد ان في الموضوع ان...قعدت في الكرسي قعد جنبي...خفت يعاكسني..وكنت افكر في رد فعل سريع...
لكن فجاة مال نحوي وسالني بقمة التهذيب:

- لو سمحتي ممكن اسالك عن حاجة
- خير...في حاجة؟
- يعني كنت عايز اسال بس...هو الاخت مرتبطة؟...واضح انك ما مخطوبة ولا متزوجة...لا يوجد دبلة في ايدك...لكن الارتباط لازم اتاكد منه منك شخصيا.
- الكلام ده ما مفروض يتقال في المواصلات العامة...بعدين انا ما بعرفك وما متعودة اتكلم مع زول ما بعرفه!
- طيب انا لو مثلا معجب بيكي وعندي نية اتقدم رسمي..اعمل شنو؟؟...اصلي بصراحة متابعك من مدة...لكن دي اول مرة اتشجع وحاول اتكلم معاكي.

{... رقص قلبي فرحا وقلت في نفسي...يابت اتاريهوا ليهو فترة متابعك!!!ده الظاهر وقع وامه ما سمت عليه...}

- انت لو فعلا متابعني من مدة زي ما بتقول...معناها انت بتعرف بيتي وبتعرف ابوي...هو الوحيد اللي ممكن يتكلم في المواضيع دي...اذا سمحت ما تحرجني اكتر من كده..

- كنتي فعلا جامدة معي..لكن حقيقة انتي اثبتي لي اني احسنت الاختيار.

{...قلت لي نفسي لحد كده الامور ماشة تمام...صديته فعلا ..لكن لمحت له للذهاب لوالدي...يعني اديته الضوء الاخضر للتحرك...}

فجأة الكمساري جاء يصرخ..

ادفعي لينا حقنا ولا حاتركبي مجاني؟!

بعد ما كنت اتتقل و اتكلف...تجي تجرح كرامتي كده؟!

جيت امد يدي لادخلها في الشنطة...لقيت الاخ سبقني وطلع قروش وحاسب الكمساري لي وله.

- لا...انا ما اقبل

- اسمحيلي انا ما ممكن اقبل انو واحدة حاتقدم ليها تدفع وانا موجود!

فرحت..فرحت..فرحت...حايتقدملي خلاص...ايوه كده..انا فعلا ما عارفة حاجة عنه...عن وظيفته...سكنه..
لكن الجواب باين من عنوانه.

اول ما البص نزل في المحطة...نزلت..ولقيته نزل معاي في نفس المحطة..وقال لي:

- انا حبيت انقذك في البص...واضح انو ما كان معاكي قروش.

شعرت بدماغي يغلي:

- انت جادي ولا بتهزر؟

- واضح انو شنطتك كانت فاضية..احنا في اخر الشهر وانا وفرت ليكي اجرة البص عشان تنفعك.

نظرت اليه مشدوهة وقلت:

- من الذي قال لك هذا الكلام الفارغ؟ انا عمري ما مشيت وشنطتي فيها اقل من مليون جنيه.

قال باستهزاء:

- لااااااااااا...ما بصدقك!

زعلت جدا من كلامه وبديت اخرج كل القروش اللي في محفظتي واعد له...حتي زادت النقود عن المليون.

لقيته مد يده واخذ القروش...وبدا يعد فيها وقال لي:

- لا...صحيح...انت معاكي قروش كتيرة.

وفي لحظة طبق القروش ودخلهم جوه جيبه وقال لي:

- انا حاخليهم معاي لغاية ما اجيكم في البيت.

قبل ما استوعب الحصل او اجد فرصة لاقول كلمة واحدة...كان الشاب قد ركب وراء صاحب موتر شكله كان ماشي وراء الباص ورانا...وفجاة كانه فص ملح وذاب.

طبعا بقيت واقفة في نص الشارع زي الهبلة...وشعرت كانه صبت فيني مطرة باردة...ولقيت نفسي متبكمة...ما عارفة اصرخ ...ولا اجري وراه...ولا امزق ملابسي...ولقيت نفسي واقفة عشرة دقائق في نص الشارع ما عارفة اتحرك واصحاب العربات يسبون لي تارة...ويشتموني تارة اخري....و

وبعدها تحاملت علي نفسي وجريتها جر حتي رحت لاقرب مكان وبدات ابكي...

ومن بين البكاء لم استطع الا ان اتفوه بكلمة واحدة اتت ممزوجة..مختلطة...وغير واضحة:

- اتسرقت!!!!








سالت دموعي سيلا غزيرا وانا اتذكر قصة قراتها في جريدة بعنوان:

احذروا الشاب الوسيم صاحب الموتر الصحراوي...اعطيته حبي ومالي وسلسلتي الذهبية واتضح انه محتال ومخادع... وكانت هذه القصة في جريدة سودانية قديمة اسمها صوت الشارع.

ووجدت ان هذه القصة انطبقت علي...وانا اواصل في بكائي ونحيبي...





و......



سالت دموعي انهارا...
في ناس كثيرين يعتقدون ان البنت هي السبب في الحاصل ليها..وان اي بنت لو كانت من الاول رضت بقليل
ما كان سيتاخر الزواج...وده وضع البنات في كل البلاد العربية...فهل البنت واهلها هم السبب في جميع المشكلات لمغالاتهم بالطلبات وتعجيز الخطبان والقضاء علي طموحاتهم وحلمهم بالارتباط؟؟؟؟وهل هذا يحبط الشباب ويضر بمستقبلهم ويفسدهم؟؟؟انا في راي المتواضع انو في فئة من المجتمع فعلا تغالي وتطلب اشياء غير معقولة...لكن الشريحة الاكبر من المجتمع تتفهم هذا الواقع وتجد اتجاه متصاعد بالرضا والقناعة حتي تساعد بناتها علي العفة وحفظ الشرف.


avatar
admin
Admin

عدد الرسائل : 519
الموقع : http://beja.topgoo.net
الدولة : النرويج
تاريخ التسجيل : 23/11/2008

"الورقة الشخصية"
"الورقة الشخصية" :: 1

http://beja.topgoo.net

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى